ಉಕ್ರೇನ್, ರಷ್ಯಾ ಸೇರಿ 7 ಮಕ್ಕಳಿಗೆ ಬದುಕು ನೀಡಿ ಉಸಿರು ನಿಲ್ಲಿಸಿದ ಸೂರತ್ ಬಾಲಕ!
ಸೂರತ್: ಕೇವಲ ಎರಡು ವರ್ಷದ ಗುಜರಾತ್ನ ಸೂರತ್ ಬಾಲಕನೊಬ್ಬ ಏಳು ಮಕ್ಕಳಿಗೆ ಬದುಕು ನೀಡಿ ಉಸಿರು ನಿಲ್ಲಿಸಿದ್ದಾನೆ.
ಸಂಜೀವ್ ಓಜಾ ಮತ್ತು ಅರ್ಚನಾ ದಂಪತಿಯ ಜಾಶ್ ಓಜಾ ಡಿಸೆಂಬರ್ 9ರಂದು ಸಂಬಂಧಿಕರ ಮನೆಯ ಎರಡನೇ ಮಹಡಿಯ ಬಾಲ್ಕನಿಯಿಂದ ಕೆಳಗೆ ಬಿದ್ದಿದ್ದ. ಆತನನ್ನು ತಕ್ಷಣವೇ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ತೆಲೆ ಭಾರೀ ಹೊಡೆತ ಬಿದ್ದಿದ್ದರಿಂದ ಮೆದುಳಿನಲ್ಲಿ ರಕ್ತಸ್ರಾವವಾಗಿ ಬಾಲಕನ ಮೆದುಳು ಡಿಸೆಂಬರ್ 14ರಂದು ಕೆಲಸ ನಿಲ್ಲಿಸಿತ್ತು.
ಬಾಲಕನಲ್ಲಿ ಉಸಿರಾಟವಿತ್ತಾದರೂ ಆತನ ಮೆದುಳು ಸಂಪೂರ್ಣ ಸ್ತಬ್ಧವಾಗಿತ್ತು. ಮಗ ಇನ್ನು ಬದುಕುವುದಿಲ್ಲ ಎನ್ನುವುದು ತಿಳಿದ ಸಂಜೀವ್ ದಂಪತಿ ಪುತ್ರನ ದೇಹದ ಅಂಗಾಂಗಗಳನ್ನು ದಾನ ಮಾಡುವ ನಿರ್ಧಾರ ಮಾಡಿದರು. ಅದರಂತೆ ಮಗುವಿನ ಹೃದಯ, ಶ್ವಾಸಕೋಶ, ಮೂತ್ರಪಿಂಡ, ಯಕೃತ್, ಕಣ್ಣನ್ನು ದಾನ ಮಾಡಲಾಗಿದೆ. ಈ ಮೂಲಕ ಮಗುವಿನ ಅಂಗಾಂಗಳನ್ನು ಏಳು ಮಕ್ಕಳಿಗೆ ದಾನ ಮಾಡಲಾಗಿದ್ದು, ಅತ್ಯಂತ ಕಿರಿಯ ಅಂಗಾಂಗ ದಾನಿಯಾಗಿ ಆತ ಹೊರಹೊಮ್ಮಿದ್ದಾನೆ.
ವಿಶೇಷವೆಂದರೆ ರಷ್ಯಾದ ನಾಲ್ಕು ವರ್ಷದ ಮಗುವಿಗೆ ಜಾಶ್ನ ಹೃದಯವನ್ನು ಅಳವಡಿಸಿದರೆ, ಉಕ್ರೇನ್ನ ನಾಲ್ಕು ವರ್ಷದ ಮಗುವಿಗೆ ಜಾಶ್ನ ಶ್ವಾಸಕೋಶಗಳನ್ನು ಕಸಿ ಮಾಡಲಾಗಿದೆ. ಶ್ವಾಸಕೋಶ ಮತ್ತು ಹೃದಯವನ್ನು ಸೂರತ್ನಿಂದ 160 ಕಿ.ಮೀ ದೂರದ ಚೆನ್ನೈಗೆ ಹೆಲಿಕಾಫ್ಟರ್ ಮೂಲಕ ಸಾಗಿಸಲಾಗಿದೆ. ಎರಡು ವರ್ಷದ ಬಾಲಕಿಗೆ ಜಾಶ್ನ ಯಕೃತ್ನ್ನು ಅಳವಡಿಸಲಾಗಿದೆ. ಮೂತ್ರಪಿಂಡಗಳನ್ನು 265 ಕಿ.ಮೀ ದೂರದ ಅಹಮದಾಬಾದ್ಗೆ ರವಾನಿಸಲಾಗಿದ್ದು, ಅಲ್ಲಿ 13 ವರ್ಷ ಮತ್ತು 17 ವರ್ಷದ ಇಬ್ಬರು ಬಾಲಕಿಯರಿಗೆ ಕಸಿ ಮಾಡಲಾಗಿದೆ ಎಂದು ವೈದ್ಯರು ಮಾಹಿತಿ ನೀಡಿದ್ದಾರೆ.
PublicNext
17/12/2020 03:22 pm
ಸಂಬಂಧಿತ ಸುದ್ದಿ
LOADING...
