ಬಂಟ್ವಾಳ: ಜನಪದ, ಶೈಕ್ಷಣಿಕ ಚಟುವಟಿಕೆಗಳ ರೂಪಕವಾದ ಬಿಇಒ ಕಚೇರಿಯ ವರ್ಣಚಿತ್ತಾರ
ಪಬ್ಲಿಕ್ ನೆಕ್ಸ್ಟ್ ವಿಶೇಷ
ಬಂಟ್ವಾಳ: ಬಿ.ಸಿ.ರೋಡಿನ ಕೈಕುಂಜೆಯಲ್ಲಿರುವ ಬಂಟ್ವಾಳ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಕಚೇರಿಯ ಒಳಭಾಗದಲ್ಲೀಗ ಜನಪದ ಶೈಕ್ಷಣಿಕ ಚಟುವಟಿಕೆಗಳನ್ನು ಸಾರುವ ವರ್ಣ ಚಿತ್ತಾರ. ಇದು ಚಿತ್ರಕಲಾ ಶಿಕ್ಷಕರ ಸಂಘದ ಸದಸ್ಯರಾಗಿರುವ ತಾಲೂಕಿನ ವಿವಿಧ ಹೈಸ್ಕೂಲುಗಳಲ್ಲಿ ಅಧ್ಯಾಪಕರಾಗಿ ಕೆಲಸ ಮಾಡುವ ಸದಸ್ಯರ ಕೊಡುಗೆ.
ತಾಯಿ ಮಗುವನ್ನು ಎತ್ತಿಕೊಂಡು ಜೋಗುಳ ಹಾಡುವ ಮೂಲಕ ತಾಯಿಯೇ ಮೊದಲ ಗುರು ಎಂಬ ಅರಿವು ಮೂಡಿಸುವ ಚಿತ್ರದ ಸಹಿತ, ಮಗು ಬೆಳೆಯುತ್ತಾ ಹೋದಂತೆ ಪರಿಸರದಲ್ಲಿ ದೊರಕುವ ಶಿಕ್ಷಣ, ಪ್ರಕೃತಿಯ ಬೆರಗು, ಶಿಕ್ಷಣದ ಪರಿಕಲ್ಪನೆ ಹಾಗೂ ಶೈಕ್ಷಣಿಕ ಚಟುವಟಿಕೆಗಳನ್ನು ಬಿಂಬಿಸುವ ಸಂಕೇತಗಳನ್ನು ಬಣ್ಣಗಳ ಮೂಲಕ ಗೋಡೆಗಳಲ್ಲಿ ಬಿಂಬಿಸಿದ್ದಾರೆ. ವರ್ಲಿ ಚಿತ್ತಾರದ ರಂಗನ್ನು ತುಂಬಿದ್ದಾರೆ. ಮಧುಬನಿ ಶೈಲಿಯ 6 ಚಿತ್ರಗಳ ಸಹಿತ ಹಲವು ಚಿತ್ರಗಳು ಇಲ್ಲಿವೆ. ಈಗಾಗಲೇ ಬಿಇಒ ಕಚೇರಿಯ ಹೊರಾಂಗಣ, ಮಾಳಿಗೆಗಳಲ್ಲಿ ಚಿತ್ರಕಲಾ ಶಿಕ್ಷಕರು ಚಿತ್ರಗಳ ಮೂಲಕ ಅರಿವು ಮೂಡಿಸಿದ್ದಾರೆ.
ಚಿತ್ರಕಲಾ ಶಿಕ್ಷಕರ ಸಂಘದ ಅಧ್ಯಕ್ಷ ವಾಮದಪದವಿನ ಮುರಳೀಕೃಷ್ಣ ರಾವ್, ಸದಸ್ಯರಾದ ಸಜಿಪಮೂಡದ ಬಾಲಕೃಷ್ಣ ಶೆಟ್ಟಿ, ಪೆರ್ನೆಯ ಚೆನ್ನಕೇಶವ ಡಿ.ಆರ್, ಮಂಚಿಯ ತಾರಾನಾಥ ಕೈರಂಗಳ, ಕೊಯಿಲದ ಧನಂಜಯ್, ಬೊಳಂತಿಮೊಗರಿನ ಉಮೇಶ್ ಎಸ್.ಜಿ., ಸಿದ್ಧಕಟ್ಟೆಯ ಅಮೀನಾ ಶೇಖ್ ಮುಂತಾದ ಚಿತ್ರಕಲಾ ಶಿಕ್ಷಕರು 14 ದಿನಗಳ ಕಾಲ ಭಿತ್ತಿ ಚಿತ್ತಾರ ಎಂಬ ಕಲ್ಪನೆಯಡಿ ಇದನ್ನು ರಚಿಸಿದ್ದಾರೆ.
Kshetra Samachara
05/08/2021 05:22 pm
ಸಂಬಂಧಿತ ಸುದ್ದಿ
LOADING...
