ಬೆಂಗಳೂರು: ಸಹಭಾಗಿತ್ವದ ಆವಿಷ್ಕಾರಗಳಿಂದ ಕೃಷಿ ಕ್ಷೇತ್ರದ ಬಹಳಷ್ಟು ಸಮಸ್ಯೆಗಳನ್ನ ಸುಲಭವಾಗಿ ಪರಿಹರಿಸಬಹುದಾಗಿದೆ. ಈ ನಿಟ್ಟಿನಲ್ಲಿ ಹಲವಾರು ಕ್ಷೇತ್ರಗಳ ತಂತ್ರಜ್ಞರು ಒಟ್ಟಾಗಿ ಕಾರ್ಯನಿರ್ವಹಿಸಬೇಕಾದ ಅವಶ್ಯಕತೆ ಹೆಚ್ಚಾಗಿದೆ. ಅನಂತಕುಮಾರ್‌ ಪ್ರತಿಷ್ಠಾನ ಆಯೋಜಿಸಿದ್ದ 10 ನೇ ನೇಷನ್‌ ಫಸ್ಟ್‌ ಡೈಲಾಗ್ಸ್‌ - ಸಹಭಾಗಿತ್ವದ ಆವಿಷ್ಕಾರಗಳು ವೆಬಿನಾರ್‌ನಲ್ಲಿ ಭಾಗವಹಿಸಿ ಮಾತನಾಡಿದರು.

ಕೃಷಿ ಕ್ಷೇತ್ರ ದೇಶದ ಆರ್ಥಿಕತೆಯಲ್ಲಿ ಪ್ರಮುಖ ಪಾತ್ರವಹಿಸುತ್ತಿದೆ. ಈ ಕ್ಷೇತ್ರದಲ್ಲಿ ಇಂದಿಗೂ ತಂತ್ರಜ್ಞಾನ ಹೆಚ್ಚಿನ ಮಟ್ಟದಲ್ಲಿ ಪ್ರಭಾವ ಬೀರಿಲ್ಲ. ಈ ಕ್ಷೇತ್ರಕ್ಕೆ ಅಗತ್ಯವಿರುವಂತಹ ಆವಿಷ್ಕಾರಗಳ ಜೊತೆಯಲ್ಲಿ ಇನ್ನಿತರ ಕ್ಷೇತ್ರಗಳ ಸಹಭಾಗಿತ್ವದ ಸಂಶೋಧನೆಗಳು ಬಹಳಷ್ಟು ಪರಿಣಾಮಕಾರಿಯಾಗಲಿವೆ. ರಾಜ್ಯ, ಕೇಂದ್ರ ಸರಕಾರಗಳು ಹಾಗೂ ಖಾಸಗಿ ಸಂಸ್ಥೆಗಳ ಸಹಭಾಗಿತ್ವದಲ್ಲಿ ಕೃಷಿ, ಆಯುರ್ವೇದದಂತಹ ಕ್ಷೇತ್ರಗಳಲ್ಲಿ ನೂತನ ಆವಿಷ್ಕಾರಗಳನ್ನು ಮಾಡುವ ಮೂಲಕ ಸಮಸ್ಯೆಗಳ ಪರಿಹಾರಕ್ಕೆ ಮುಂದಾಗಬೇಕು ಎಂದು ಹೇಳಿದರು.

ದ ಅಗ್ರಿ ಕೊಲ್ಯಾಬೊರೆಟರಿ ಸಂಸ್ಥೆಯ ಸಂಸ್ಥಾಪಕರಾದ ನಿಪುಣ್‌ ಮೆಹತ್ರೋತ್ರಾ ಮಾತನಾಡಿ, ಮೊದಲು ಕ್ಷೇತ್ರದಲ್ಲಿರುವ ಸಮಸ್ಯೆಗಳ ಬಗ್ಗೆ ಸ್ಪಷ್ಟ ಚಿತ್ರಣ ಪಡೆದುಕೊಳ್ಳುವುದು ಸೂಕ್ತ. ಕೃಷಿ ಕ್ಷೇತ್ರದಲ್ಲಿನ ಕೌಶಲ್ಯಗಳ ಕೊರತೆ, ಉತ್ಪನ್ನಗಳಿಗೆ ಸರಿಯಾದ ಬೆಲೆ ಸಿಗದೇ ಇರುವುದು ಇಂತಹ ಹಲವಾರು ಸಮಸ್ಯೆಗಳ ಬಗ್ಗೆ ತಿಳುವಳಿಕೆ ಮುಖ್ಯ. ಡಿಜಿಟಲ್‌ ಕ್ಷೇತ್ರದಲ್ಲಿ ಆಗುತ್ತಿರುವ ಹಲವಾರು ಆವಿಷ್ಕಾರಗಳು ಕೃಷಿ ಕ್ಷೇತ್ರದಲ್ಲು ಪ್ರಮುಖ ಬದಲಾವಣೆಯನ್ನು ತರಬಹುದಾಗಿದೆ. ಆವಿಷ್ಕಾರಗಳನ್ನು ವಹಿವಾಟು ಮತ್ತು ಸಾಮಾಜಿಕ ಪರಿಣಾಮಗಳ ಜೊತೆಯಲ್ಲಿ ಜೊತೆಗೂಡಿಸುವುದು ಇಂದಿನ ಅಗತ್ಯವಾಗಿದೆ. ಸಾಮಾಜಿಕ ಪರಿಣಾಮಗಳಿಂದ ವಹಿವಾಟನ್ನು ಹೊರತುಪಡಿಸಲು ಸಾಧ್ಯವಿಲ್ಲ. ಈ ನಿಟ್ಟಿನಲ್ಲಿ ಆವಿಷ್ಕಾರಗಳು ಆಗಬೇಕು ಆದರೆ, ಯಾವ ರೀತಿಯಲ್ಲಿ ಹಾಗೂ ಯಾವ ವಿಷಯಗಳನ್ನ ಅದು ಒಳಗೊಂಡಿರುಬೇಕು ಎನ್ನುವ ಸೂಕ್ಷ್ಮತೆಯ ಅರಿವು ಮೂಡಿಸುವುದು ಇಂದಿನ ಅಗತ್ಯವಾಗಿದೆ ಎಂದರು.

ಎಐಸಿಟಿಇನ ಸಿಓಓ ಡಾ. ಬುದ್ದ ಚಂದ್ರಶೇಖರ್‌ ಮಾತನಾಡಿ, ನೂತನ ರಾಷ್ಟ್ರೀಯ ಶಿಕ್ಷಣ ನೀತಿಯಲ್ಲಿ ಆವಿಷ್ಕಾರಗಳು, ಸಂಶೋಧನೆಗಳಿಗೆ ಹೆಚ್ಚಿನ ಆದ್ಯತೆಯನ್ನು ನೀಡಲಾಗಿದೆ. ಹಿಂದಿನ ಶಿಕ್ಷಣ ಪದ್ದತಿಯಲ್ಲಿ ಇದ್ದಂತಹ ಹಲವಾರು ಲೋಪದೋಷಗಳನ್ನು ತಗೆದು ಹಾಕುವ ಮೂಲಕ ನೂತನ ಶಿಕ್ಷಣ ನೀತಿಯಲ್ಲಿ ಮಕ್ಕಳನ್ನ ಸಂಶೋಧನೆಯತ್ತ ಹೆಚ್ಚಿನ ಗಮನ ಹರಿಸುವಂತೆ ಮಾಡಲಾಗಿದೆ. ಸಹಭಾಗಿತ್ವದ ಅವಿಷ್ಕಾರಗಳು ಪ್ರಮುಖ ಪಾತ್ರವನ್ನು ವಹಿಸಲಿದ್ದು, ಭಾರತ ವಿಶ್ವದ ಆವಿಷ್ಕಾರಗಳ ರಾಜಧಾನಿಯಾಗಬೇಕು ಎಂದರು.

ಕಾರ್ಯಕ್ರಮದಲ್ಲಿ ಕಾರ್ಯಕ್ರಮದಲ್ಲಿ ಅನಂತಕುಮಾರ್‌ ಪ್ರತಿಷ್ಠಾನದ ಅಧ್ಯಕ್ಷರಾದ ಪ್ರೋ. ಪಿ.ವಿ ಕೃಷ್ಣ ಭಟ್‌, ಅದಮ್ಯ ಚೇತನ ಟ್ರಸ್ಟಿಗಳಾದ ಪ್ರದೀಪ್‌ ಓಕ್‌, ಹಿರಿಯ ಪತ್ರಕರ್ತ ರಾಘವನ್‌ ಶ್ರೀನಿವಾಸನ್‌ ಸೇರಿದಂತೆ ದೇಶದ ವಿವಿಧ ಭಾಗಗಳಿಂದ ಸುಮಾರು 800 ಕ್ಕೂ ಹೆಚ್ಚು ಜನರು ಭಾಗವಹಿಸಿದ್ದರು.