ಗದಗ: ಸಾಧಕ ಕೃಷಿಕರಾದ ಸ್ವಾಮೀಜಿ: ಮಠದ ಜಮೀನನಲ್ಲಿ ಯಶಸ್ವಿ ರೈತರಾದ ದಿಂಗಾಲೇಶ್ವರ ಶ್ರೀ...!
ಗದಗ: ಕೈ ಕೆಸರಾದರೆ ಬಾಯಿ ಮೊಸರು ಎಂಬುವಂತ ಮಾತು ಅಕ್ಷರಶಃ ಸತ್ಯ. ಕೋಟಿ ವಿದ್ಯೆಗಿಂತ ಮೇಟಿ ವಿದ್ಯೆಯೇ ಮೇಲು ಎಂಬುವುದಕ್ಕೆ ಇಲ್ಲೊಬ್ಬ ಸ್ವಾಮಿಗಳು ಸಾಕ್ಷಿಯಾಗಿದ್ದಾರೆ. ತಮ್ಮ ಮಠದಲ್ಲಿಯೇ ಕೃಷಿ ಮಾಡಿ ಯಾವುದೇ ಕೃಷಿಕನಿಗೂ ಕಡಿಮೆ ಇಲ್ಲ ಎಂಬುವುದನ್ನು ತೋರಿಸಿಕೊಟ್ಟಿದ್ದಾರೆ.
ಹೌದು..ಜಿಲ್ಲೆಯ ಲಕ್ಷ್ಮೇಶ್ವರ ತಾಲೂಕಿನ ಬಾಲೆಹೊಸೂರು ಗ್ರಾಮದ ದಿಂಗಾಲೇಶ್ವರ ಮಠದ ಪೀಠಾಧಿಪತಿಗಳಾದ ದಿಂಗಾಲೇಶ್ವರ ಮಹಾಸ್ವಾಮಿಗಳೇ ಕೃಷಿ ಮಾಡಿ ಯಶಸ್ವಿಯಾಗಿದ್ದಾರೆ. ಅವರ ತೋಟವನ್ನು ನೋಡೋದು ಅಂದರೆ ಕಣ್ಣಿಗೆ ಒಂದು ಹಬ್ಬ. ಶ್ರೀ ಮಠವು 25 ಎಕರೆ ಜಮೀನನ್ನು ಹೊಂದಿದ್ದು, ಆ ಪೈಕಿ 15 ಎಕರೆ ಜಮೀನಿನಲ್ಲಿ ತೋಟವನ್ನು ಮಾಡುತ್ತಿದ್ದಾರೆ. ದಿಂಗಾಲೇಶ್ವರ ಸ್ವಾಮೀಜಿಗಳು 2014 ರಲ್ಲಿ ಗ್ರಾಮದಲ್ಲಿ ಮಹಿಳೆಯರಿಗೆ ಉಡಿ ತುಂಬವ ಕಾರ್ಯಕ್ರವನ್ನು ಆಯೋಜನೆ ಮಾಡಿದ್ದರು. ಆಗ ಒಬ್ಬ ಮಹಿಳೆಗೆ ಎರಡು ಸಸಿಯನ್ನು ನೀಡಿ ಪರಿಸರ ಕಾಳಜಿಯನ್ನು ತೋರಿಸಿಕೊಟ್ಟಿದ್ದರು. ಆಗಲೇ ಶ್ರೀಗಳು ಶ್ರೀ ಮಠದ ಜಮೀನಿನಲ್ಲಿ ತೋಟವನ್ನು ಮಾಡುವ ಸಂಕಲ್ಪವನ್ನು ಮಾಡಿದ್ದರು.
15 ಎಕರೆ ಜಮೀನಿನ ಸುತ್ತ ತಂತಿ ಬೇಲಿಯನ್ನು ಹಾಕಿಸಿ, ಸಾವಿರಾರು ಟ್ರಿಪ್ ಕೆರೆಯ ಫಲವತ್ತಾದ ಮಣ್ಣನ್ನು ತೆಗೆದುಕೊಂಡು ಬಂದು ಜಮೀನಿಗೆ ಹಾಕಿ ಜಮೀನು ಫಲವತ್ತತೆಯಾದ ಬಳಿಕ ತೋಟವನ್ನು ಮಾಡಲು ಮುಂದಾಗುತ್ತಾರೆ. 15 ಎಕರೆ ಜಮೀನಿನಲ್ಲಿ ವಿವಿಧ ಜಾತಿಯ 10 ಸಾವಿರ ಸಸ್ಯಗಳನ್ನು ನಾಟಿ ಮಾಡಿದ್ದು, ಈವಾಗ ಹೆಮ್ಮರವಾಗಿ ಬೆಳೆದು ನಿಂತಿವೆ..
1500 ಚಿಕ್ಕು ಹಣ್ಣಿನ ಗಿಡ, 1500 ಪೇರಲ್, 1500 ನಿಂಬೆ, 1500 ಕರಿಬೇವು, 500 ಮಾವಿನ ಗಿಡಗಳು, 2000 ಸಾಗವಾನಿ ಮರ, 500 ತೆಂಗು, ನೆಲ್ಲಿ, ನೇರಳೆ, ಅಂಜೂರ, ಸೇರಿದಂತೆ, ವಿವಿಧ ಜಾತಿಯ 50 ಗಿಡಗಳು, ಒಟ್ಟು 10 ಸಾವಿರ ಗಿಡಗಳನ್ನು ನಾಟಿ ಮಾಡಿದ್ದಾರೆ. 30 ಅಡಿ ಅಂತರದಲ್ಲಿ ತಗ್ಗು ಗುಂಡಿ ತೆಗೆದು, ಸಾವಯವ ಪದ್ಧತಿ ಮೂಲಕ ಸಸಿಯನ್ನು ನಾಟಮಾಡಿದ್ದು, ಇನ್ನೂ ಬಳ್ಳಾರಿ, ಧಾರವಾಡ , ಬೆಳಗಾವಿ ಸೇರಿದಂತೆ ರಾಜ್ಯದ ನಾನಾ ಕಡೆಯಿಂದ ತಂದು ನಾಟಿ ಮಾಡಿದ್ದಾರೆ. 30 ಅಡಿ ಅಂತರದಲ್ಲಿ ಖಾಲಿ ಜಾಗದಲ್ಲಿ ಬೇರೆ ಬೇರೆ ಬೆಳೆಗಳನ್ನು ಸಹ ತೆಗೆದುಕೊಂಡಿದ್ದಾರೆ.
ಮಲ್ಲೇಶ ಸೂರಣಗಿ ಪಬ್ಲಿಕ್ ನೆಕ್ಸ್ಟ್ ಹುಬ್ಬಳ್ಳಿ
PublicNext
09/11/2021 03:44 pm
ಸಂಬಂಧಿತ ಸುದ್ದಿ
LOADING...
