ಮಹಾರಾಷ್ಟ್ರ ಸರ್ಕಾರವನ್ನು ಅಲ್ಲಾಡಿಸಿ, ಕೊನೆಗೆ ಉದ್ಧವ್​ ಠಾಕ್ರೆ ಅವರನ್ನು ಸಿಎಂ ಸ್ಥಾನದಿಂದ ಕೆಳಗಿಳಿಸಿ, ಮುಖ್ಯಮಂತ್ರಿ ಖುರ್ಚಿಯನ್ನು ಏರಿದ ಈ ಏಕನಾಥ್ ಶಿಂಧೆ ಯಾರು? ಅವರ ಹಿನ್ನೆಲೆ ಏನು ಎಂಬ ಕುತೂಹಲವಿದ್ದರೆ, ಇಲ್ಲಿದೆ ನೋಡಿ ಮಾಹಿತಿ.

ಈ ಹಿಂದೆ ಆಟೋ ಚಾಲಕರಾಗಿದ್ದ ಏಕನಾಥ ಶಿಂಧೆ ಇನ್ನು ಮುಂದೆ ಮುಖ್ಯಮಂತ್ರಿ ಎಂದು ಕರೆಸಿಕೊಳ್ಳಲಿದ್ದಾರೆ. ಥಾಣೆಯಲ್ಲಿ ಆಟೋ ಓಡಿಸುತ್ತಿದ್ದ ಶಿಂಧೆ ಶಿವಸೇನೆ ಸೇರಿ, ಬಳಿಕ ಶಾಸಕನಾಗಿ, ಸಚಿವನಾಗಿ, ವಿರೋಧ ಪಕ್ಷದ ನಾಯಕನಾಗಿ ಇದೀಗ ಮುಖ್ಯಮಂತ್ರಿಯಾಗಿ ಬೆಳೆದು ನಿಂತಿದ್ದಾರೆ. ತಮ್ಮ ಸಂಘಟನಾ ಚಾತುರ್ಯದಿಂದಾಗಿ ಹಂತಹಂತವಾಗಿ ಬೆಳೆದು ಬಂದ ಶಿಂಧೆ, ಮಾಸ್ ಲೀಡರ್‌ ಆಗಿ ಪರಿವರ್ತನೆಯಾಗಿದ್ದಾರೆ. ಶಿವಸೇನೆಯಲ್ಲಿ ಉದ್ಧವ್‌ ಠಾಕ್ರೆ ಬಳಿಕ ನಂಬರ್‌ 2 ಎನಿಸಿಕೊಂಡಿದ್ದ ಅವರು, ಅಘಾಡಿ ಸರ್ಕಾರದಲ್ಲಿ ನಗರಾಭಿವೃದ್ಧಿ ಹಾಗೂ ಲೋಕೋಪಯೋಗಿ ಖಾತೆಯ ಸಚಿವರಾಗಿ ಕೆಲಸ ಮಾಡಿದ್ದರು.

1964ರ ಫೆ. 9ರಂದು ಸತಾರದ ಜಾವಳಿ ತಾಲೂಕಿನಲ್ಲಿ ಮರಾಠಾ ಸಮುದಾಯದಲ್ಲಿ ಏಕನಾಥ್ ಸಂಭಾಜಿ ಶಿಂದೆ ಜನಿಸಿದ್ದರು. ಪದವಿ ಮುಗಿಸುವುದಕ್ಕೂ ಮುನ್ನವೇ ಕಾಲೇಜು ತೊರೆದಿದ್ದ ಶಿಂಧೆ, ಮುಂಬಯಿ ಸಮೀಪದ ಥಾಣೆಯಲ್ಲಿ ಆಟೋ ಡ್ರೈವರ್ ಆಗಿ ಕೆಲಸ ಮಾಡಿದ್ದರು. ಮೂಲತಃ ಪಶ್ಚಿಮ ಮಹಾರಾಷ್ಟ್ರದ ಸತಾರದವರಾಗಿರುವ ಶಿಂಧೆ, 1966 ರಲ್ಲಿ ಬಾಳಾ ಸಾಹೇಬ್‌ ಠಾಕ್ರೆ ಅವರಿಂದ ಪ್ರಭಾವಿತರಾಗಿ ಶಿವಸೇನೆಗೆ ಸೇರಿದ್ದರು. ಬಾಳಾ ಠಾಕ್ರೆವರ ಮರಾಠಿ ಅಸ್ಮಿತೆ ಹಾಗೂ ಹಿಂದುತ್ವದ ಪ್ರಚಾರದಕ್ಕೆ ಮಾರು ಹೋಗಿದ್ದ ಶಿಂಧೆ, ಬಳಿಕ ಥಾಣೆಯಲ್ಲಿ ಶಿವಸೇನೆಯನ್ನು ಕಟ್ಟುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

ಬಾಳಾ ಸಾಹೇಬ್‌ ಠಾಕ್ರೆ ಅವರ ಗರಡಿಯಲ್ಲಿ ಪಳಗಿದ್ದ ಶಿಂಧೆ, ಅವರಂತೆ ಪ್ರಬಲ ಹಿಂದುತ್ವದ ಪ್ರತಿಪಾದರಕೂ ಹೌದು. ಮರಾಠಿ, ಹಿಂದುತ್ವದ ವಿಚಾರ ಬಂದಾಗ ಅಕ್ರಮಣಕಾರಿಯಾಗಿ ಬೀದಿಗೆ ಇಳಿದು ಪ್ರತಿಭಟಿಸುತ್ತಿದ್ದರು. ತಮ್ಮ ಅಕ್ರಮಣಕಾರಿ ವರ್ತನೆಗಳಿಂದಲೇ ಜನರ ಮನಸ್ಸಲ್ಲಿ ಸ್ಥಾನ ಪಡೆದ ಶಿಂಧೆ, ಬಾಳಾ ಠಾಕ್ರೆಯ ಅವರ ನೀಲಿಗಣ್ಣಿನ ಹುಡುಗನಾಗಿ ಗುರುತಿಸಿಕೊಂಡಿದ್ದರು.

1997 ರಲ್ಲಿ ಮೊದಲ ಬಾರಿ ಚುನಾವಣಾ ರಾಜಕೀಯಕ್ಕಿಳಿದ ಏಕನಾಥ್‌ ಶಿಂಧೆ ತಮ್ಮ ಮೊದಲ ಚುನಾವಣೆಯಲ್ಲಿಯೇ ಗೆದ್ದು ಭರ್ಜರಿ ಪಾದಾರ್ಪಣೆ ಮಾಡಿದ್ದರು. ಥಾಣೆ ಪಾಲಿಕೆ ಚುನಾವಣೆಯಲ್ಲಿ ಸ್ಪರ್ಧಿಸಿ ಮೊದಲ ಪ್ರಯತ್ನದಲ್ಲೇ ಕಾರ್ಪೊರೇಟರ್‌ ಆಗಿ ಆಯ್ಕೆಯಾದರು. 2004 ಕೊಪ್ರಿ- ಪಚ್ಪಾಖಾಡಿ ವಿಧಾನಸಭೆ ಕ್ಷೇತ್ರದಿಂದ ಸ್ಪರ್ಧೆ ಮಾಡಿ ವಿಧಾನಭೆಗೆ ಪ್ರವೇಶ ಮಾಡಿದ ಶಿಂಧೆ ಸತತ ನಾಲ್ಕನೇ ಬಾರಿ ಗೆದ್ದು, ಇದೀಗ ಮಹಾರಾಷ್ಟ್ರದ ಮುಖ್ಯಮಂತ್ರಿಯಾಗಿ ನಿಯುಕ್ತಿಯಾಗಿದ್ದಾರೆ.

2005 ರಲ್ಲಿ ಥಾಣೆ ಜಿಲ್ಲೆಯ ಶಿವಸೇನೆಯ ಅಧ್ಯಕ್ಷರಾಗಿದ್ದ ಶಿಂಧೆ, 2014 ರಲ್ಲಿ ಕೆಲ ಅವಧಿಗೆ ಮಹಾರಾಷ್ಟ್ರ ವಿರೋಧ ಪಕ್ಷದ ನಾಯಕನಾಗಿಯೂ ಕಾರ್ಯ ನಿರ್ವಹಿಸಿದ್ದರು. ಶಾಸಕರಾಗಿ ಆಯ್ಕೆಯಾಗುವ ಮುನ್ನ ಅವರು ಎರಡು ಬಾರಿ ಥಾಣೆ ಪಾಲಿಕೆ ಕೌನ್ಸಿಲರ್ ಆಗಿದ್ದರು. ಮೂರು ವರ್ಷ ಸ್ಥಾಯಿ ಸಮಿತಿ ಸದಸ್ಯರಾಗಿ ಮತ್ತು ಸದನದ ನಾಯಕರಾಗಿ ನಾಲ್ಕು ವರ್ಷ ಕಾರ್ಯ ನಿರ್ವಹಿಸಿದ್ದರು.