ವಿರಾಟ್‌ ಕೊಹ್ಲಿ ಜೊತೆ ಸೆಲ್ಫಿಗಾಗಿ ಪಾಕ್‌ನಿಂದ ದುಬೈಗೆ ಬಂದ ಫ್ಯಾನ್!
ದುಬೈ: ಟೀಮ್‌ ಇಂಡಿಯಾ ಮಾಜಿ ನಾಯಕ ವಿರಾಟ್‌ ಕೊಹ್ಲಿ ವಿಶ್ವದಾದ್ಯಂತ ಸಾಕಷ್ಟು ಅಭಿಮಾನಿ ಬಳಗವನ್ನು ಹೊಂದಿದ್ದಾರೆ. ಅದರಂತೆ ಪಾಕಿಸ್ತಾನದಲ್ಲಿಯೂ ಕಿಂಗ್‌ ಕೊಹ್ಲಿ ಅಂದ್ರೆ ಹುಚ್ಚು. ವಿರಾಟ್‌ ಕೊಹ್ಲಿ ಜೊತೆ ಸೆಲ್ಫಿ ತೆಗೆದುಕೊಂಡ ಪಾಕಿಸ್ತಾನ ಅಭಿಮಾನಿಯೊಬ್ಬ ತಮ್ಮ ನೆಚ್ಚಿನ ಆಟಗಾರನನ್ನು ವಿಶೇಷ ಪದಗಳಿಂದ ಗುಣಗಾನ ಮಾಡಿದ್ದಾರೆ. ಈ ವಿಡಿಯೋ ಸಿಕ್ಕಾಪಟ್ಟೆ ವೈರಲ್‌ ಆಗಿದೆ.
ಆಗಸ್ಟ್‌ 27ರಿಂದ ಆರಂಭವಾಗುವ 2022ರ ಏಷ್ಯಾ ಕಪ್‌ ಟೂರ್ನಿಯಲ್ಲಿ ಭಾರತ ಹಾಗೂ ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗಲಿವೆ. ಆಗಸ್ಟ್‌ 28 ರಂದು ತನ್ನ ಮೊದಲನೇ ಪಂದ್ಯದಲ್ಲಿ ಸೆಣಸಲಿರುವ ಉಭಯ ತಂಡಗಳು, ನಂತರ ಸೂಪರ್‌ ಫೋರ್‌ ಹಂತದಲ್ಲಿಯೂ ಕಾದಾಟ ನಡೆಸಲಿವೆ.
ಅಂದಹಾಗೆ ಸಾಂಪ್ರದಾಯಿಕ ಎದುರಾಳಿಗಳ ಕಾದಾಟವನ್ನು ಕಣ್ತುಂಬಿಸಿಕೊಳ್ಳಲು ಭಾರತ ಹಾಗೂ ಪಾಕಿಸ್ತಾನದಿಂದ ಅಭಿಮಾನಿಗಳು ಬಹು ಸಂಖ್ಯೆಯಲ್ಲಿ ದುಬೈಗೆ ಆಗಮಿಸಿದ್ದಾರೆ. ಅದರಂತೆ ಬುಧವಾರ ತಮ್ಮ ನೆಚ್ಚಿನ ಆಟಗಾರ ವಿರಾಟ್‌ ಕೊಹ್ಲಿ ಜೊತೆ ಸೆಲ್ಫಿ ತೆಗೆದುಕೊಳ್ಳಲು ಪಾಕಿಸ್ತಾನಿ ಅಭಿಮಾನಿಗಳು ಮುಗಿ ಬಿದ್ದಿದ್ದರು. ಅದರಂತೆ ಪಾಕಿಸ್ತಾನದ ಲಾಹೋರ್‌ನಿಂದ ದುಬೈಗೆ ಬಂದಿದ್ದ ಮೊಹಮ್ಮದ್‌ ಜಿಬ್ರಾನ್‌ ಎಂಬ ಯುವಕ ತಮ್ಮ ನೆಚ್ಚಿನ ಆಟಗಾರ ವಿರಾಟ್‌ ಕೊಹ್ಲಿ ಜೊತೆ ಸೆಲ್ಫಿ ತೆಗೆದುಕೊಳ್ಳಲು ಒಂದು ತಿಂಗಳಿಂದ ಕಾದಿದ್ದರು.
ಬುಧವಾರ ವಿರಾಟ್‌ ಕೊಹ್ಲಿ ಅಭ್ಯಾಸ ಮುಗಿಸಿಕೊಂಡು ಹೋಟೆಲ್‌ಗೆ ವಾಪಸ್‌ ಆಗುತ್ತಿದ್ದ ವೇಳೆ ಪಾಕ್‌ ಯುವಕ ಸೆಲ್ಫಿ ತೆಗೆದುಕೊಳ್ಳಲು ಮುಂದಾಗಿದ್ದರು. ಈ ವೇಳೆ ಭದ್ರತಾ ಸಿಬ್ಬಂದಿ ತಡೆದರು. ಈ ಸಂದರ್ಭದಲ್ಲಿ ಜಿಬ್ರಾನ್‌, ಕೊಹ್ಲಿ ಹೆಸರನ್ನು ಜೋರಾಗಿ ಕೂಗಿ ಸೆಲ್ಫಿಗೆ ಮನವಿ ಮಾಡಿದರು. ಇದನ್ನು ಗಮನಿಸಿದ ವಿರಾಟ್‌ ಕೊಹ್ಲಿ, ಹಿಂದೆ ಬಂದು ಪಾಕ್‌ ಅಭಿಮಾನಿಯ ಸೆಲ್ಪಿಗೆ ಸಹಕರಿಸಿದರು.
PublicNext
26/08/2022 07:33 pm
ಸಂಬಂಧಿತ ಸುದ್ದಿ
LOADING...
