ಸೆ.23ಕ್ಕೆ ‘ಅವತಾರ್’ ರಿ-ರಿಲೀಸ್, 2 ವಾರ ಮಾತ್ರ ಪ್ರದರ್ಶನ; ಪ್ರೇಕ್ಷಕರಿಗೆ 4k ರೆಸಲ್ಯೂಷನ್ ಅನುಭವ
ಸೆಪ್ಟೆಂಬರ್ 23ರಂದು ‘ಅವತಾರ್’ ರಿ-ರಿಲೀಸ್ ಆಗುತ್ತದೆ. ಆದರೆ ಒಂದು ಷರತ್ತು ಕೂಡ ಇದೆ. ಈ ಬಾರಿ ಈ ಸಿನಿಮಾ ಚಿತ್ರಮಂದಿರದಲ್ಲಿ ಪ್ರದರ್ಶನ ಕಾಣುವುದು ಕೇವಲ 2 ವಾರ ಮಾತ್ರ ಎಂದು ಹೇಳಲಾಗಿದೆ. ಇದನ್ನು ತಿಳಿಸುವ ಸಲುವಾಗಿ ಸೋಶಿಯಲ್ ಮೀಡಿಯಾದಲ್ಲಿ ಪೋಸ್ಟರ್ಗಳನ್ನು ಹಂಚಿಕೊಂಡಿದೆ ಚಿತ್ರತಂಡ. ಅಲ್ಲದೇ, ರೀ-ರಿಲೀಸ್ ಪ್ರಯುಕ್ತ ಹೊಸ ಟ್ರೇಲರ್ ಕೂಡ ಬಿಡುಗಡೆ ಮಾಡಲಾಗಿದೆ.
2009ರಲ್ಲಿ ಬಂದ ‘ಅವತಾರ್’ (Avatar) ಸಿನಿಮಾ ವಿಶ್ವಾದ್ಯಂತ ಧೂಳೆಬ್ಬಿಸಿತ್ತು. ಪ್ರತಿ ಬಾರಿ ಮರು ಬಿಡುಗಡೆ ಆದಾಗಲೂ ಈ ಹಾಲಿವುಡ್ ಸಿನಿಮಾವನ್ನು ಜನರು ಮುಗಿಬಿದ್ದು ನೋಡಿದ ಉದಾಹರಣೆ ಇದೆ. ಈಗ ಮತ್ತೊಮ್ಮೆ ಚಿತ್ರವನ್ನು ಥಿಯೇಟರ್ನಲ್ಲಿ ಕಣ್ತುಂಬಿಕೊಳ್ಳುವ ಅವಕಾಶ ಸಿಗುತ್ತಿದೆ.
ಜೇಮ್ಸ್ ಕ್ಯಾಮೆರಾನ್ ನಿರ್ದೇಶನದ ‘ಅವತಾರ್’ ಸಿನಿಮಾದ ಪ್ರತಿ ದೃಶ್ಯ ಕೂಡ ಬೇರೆ ಲೋಕಕ್ಕೆ ಕರೆದುಕೊಂಡು ಹೋಗುತ್ತದೆ. ಈಗ ಇನ್ನೊಮ್ಮೆ ಚಿತ್ರಮಂದಿರದಲ್ಲಿ ಈ ಸಿನಿಮಾ ರಾರಾಜಿಸಲಿದೆ. ಜಗತ್ತಿನಾದ್ಯಂತ ಇರುವ ಸಿನಿಪ್ರಿಯರು ಸೆಪ್ಟೆಂಬರ್ 23ಕ್ಕಾಗಿ ಕಾಯುತ್ತಿದ್ದಾರೆ.
ಅಷ್ಟಕ್ಕೂ ಈಗ ಈ ಸಿನಿಮಾ ರಿ-ರಿಲೀಸ್ ಯಾಕೆ? ಅದಕ್ಕೂ ಮುಖ್ಯ ಕಾರಣ. ‘ಅವತಾರ್’ ಸಿನಿಮಾದ ಮುಂದುವರಿದ ಕಥೆ ಬಗ್ಗೆ ತಿಳಿದುಕೊಳ್ಳಬೇಕು ಎಂಬುದು ಸಿನಿಪ್ರಿಯರ ಆಸೆ. ಅದಕ್ಕಾಗಿ ಈ ಚಿತ್ರದ ಸೀಕ್ವೆಲ್ ಬರಬೇಕು ಎಂದು ಎಲ್ಲರೂ ಬಯಸುತ್ತಿದ್ದರು. ನಿರ್ದೇಶಕ ಜೇಮ್ಸ್ ಕ್ಯಾಮೆರಾನ್ ಈ ಚಿತ್ರದ ಎರಡನೇ ಪಾರ್ಟ್ ಸಿದ್ಧ ಪಡಿಸುತ್ತಿದ್ದಾರೆ. ಅದಕ್ಕೆ ‘ಅವತಾರ್: ದಿ ವೇ ಆಫ್ ವಾಟರ್’ ಎಂದು ಹೆಸರು ಇಡಲಾಗಿದೆ. ಈ ವರ್ಷವೇ ಆ ಚಿತ್ರ ರಿಲೀಸ್ ಆಗಲಿದೆ. ಅದಕ್ಕೂ ಮುನ್ನ ಜನರನ್ನು ಮತ್ತೆ ಅವತಾರ್ ಲೋಕಕ್ಕೆ ಕೊಂಡೊಯ್ಯಲು ಮೊದಲ ಪಾರ್ಟ್ ಅನ್ನು ರೀ-ರಿಲೀಸ್ ಮಾಡಲಾಗುತ್ತಿದೆ.
‘ಅವತಾರ್’ ಸಿನಿಮಾಗೆ ಈಗ ಒಂದಷ್ಟು ಹೊಸ ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ. 4ಕೆ ರೆಸಲ್ಯೂಷನ್ನಲ್ಲಿ ಸಿನಿಮಾ ಬಿತ್ತರ ಆಗಲಿದೆ. ಇದು ಪ್ರೇಕ್ಷಕರಿಗೆ ಹೊಸ ಅನುಭವ ನೀಡಲಿದೆ. ಬರೋಬ್ಬರಿ 13 ವರ್ಷಗಳ ಹಿಂದಿನ ಈ ಸಿನಿಮಾವನ್ನು ಈ ಕಾಲದ ತಂತ್ರಜ್ಞಾನಕ್ಕೆ ಅಪ್ಗ್ರೇಡ್ ಮಾಡಲು ಪ್ರಯತ್ನಿಸಲಾಗಿದೆ. ಈ ಸಿನಿಮಾದ ಗ್ರಾಫಿಕ್ಸ್ ದೃಶ್ಯಗಳನ್ನು ನೋಡುವುದೇ ಒಂದು ಅದ್ಭುತ ಅನುಭವ.
PublicNext
24/08/2022 12:42 pm
ಸಂಬಂಧಿತ ಸುದ್ದಿ
LOADING...
